انما اشكو بثي..

يمكن دي من المرات القليلة اللي حكتب بيها هنا بالعامية..و القليلة اللي عملت فيها كدة..           بس انا المرة دي بكتب توثيقا لحالة انا وصلتلها..

فانا بستسمح اللي حيقرا-لو حد را- انه ما يستغربش..و يسيب شوية كلام كان مكتوم..يطلع براحته..
---------------------------------------------------------

فيه حالة بتوصلها..انك زهقت من كل الناس..و زهقت من كل مشاكلهم..حتى الحاجات الحلوة انت
ما بقتش عايزها خوفا من تبعاتها..

و تحس انك عايز تعيش لوحدك..و تاخد كل ذكرياتك الحلوة تعيش بيها في عالمك الخيالي..

حتقولي احنا ما اتخلقناش لده..ولازم نعاشر الناس..و لازم نستحمل حلوهم و مرهم..حقولك عارف كل ده..بس خلاص..قرفت!

انا تعبت بشكل غير طبيعي..فقدت اتزاني خالص..و بفقد صبري..و انسانيتي..و عقلي..و مشاعري..

انا بتحول تدريجيا لحاجة انا ما اعرفهاش..حاجة بتكره كل حاجة..حاجة مش عايزة تفتكر حاجة..حاجة مليانة غل و يأس و حزن و كره..حاجة ماعندهاش صبر..

حتقري الكلام ده و تقول دراما انا عارف..لا مش دراما..دي الحقيقة اللي عمال اهرب منها..دي المشاعر اللي ما بقتش قادر استحملها..

انا كل مشاعري اتشوهت..بقيت ما بعرفش احب حد عشان بخاف..بقيت بشك في نظرتي للناس..بقيت بحس ان كل اللي حواليا احسن مني واحس بالحقد بيخش قلبي..

انابقيت بنفخ في نفسي..و اتكلم عني كتير عشان أخفي ترددي و شعوري بالخيبة و النقص و التردد..

انا بقيت ببص في المرايا و اشوف دموعي اللي مش عايزة تنزل قدام حد..حتى اهلي..و بتستنى لحظة لما ابقى في أوضتي لوحدي..زي دلوقتي كدة..

انا اسف..بس انا بقيت بشوف الحروف بالعافية من النقط اللي بتتجمع على ازاز نظارتي..

انا ما بقيتش احارب مشاعري السلبية..الموضوع ما بقاش بسهولة الكلام اللي بيقوله اي حد بينصح..

انا عارف ان اي حد بيفتكر تصرفاتي جنون..و بيشوفوا اني بتعصب بشكل مبالغ فيه..بس..لما الكمان بيتكسر..صوته بيبقى نشاز..

انا ما بقتش مهتم..حتى الناس اللي كنت ببقى عايز يشوفوا كلامي ما بقتش مهتم انهم يشوفوه..ببساطة..ما حدش يستحق انه يعاني بسبب عقدي..

انا بكتب هنا مش عشان حد يقرا و يقول يا حرام..و لا يقولي مالك..لا..انا بكلم نفسي هنا..و بطلع كل اللي كنت كاتمه..

حقول حاجة و عارف اني حكتبها بالعافية و حسيب الموبايل بعديها و اعيط.."انما اشكو بثي و حزني
الى الله"..

عاي حد بس يقولي..فيه امل ارجع تاني؟ فيه امل ان اللي اتكسر جوايا يتصلح؟؟