من زمان..جدا..

خايف اكون مش فاهم نفسي..و مش مقدر الموقف..ومش عارف انا صادق فين..

للحظة..افتكرت كل شئ انتهى واني لازم اتخطى واتجاوز و اقنع نفسي بكدة..

وبعد لفة طويلة..وصدمة قدرية غريبة ترجعك متشعلق تاني لنقطة الصفر..تلاقي نفسك بتقولك خليك وفي لحد ما ينقطع الشك باليقين سواء كان ليك او عليك..

وبعد ما كنت بقنع نفسي اني عمري ما كنت مغرم..وبنكر ده..عشان اتجاوز واتخطى..الاقي كل امواج الذكريات بتهاجم عشان تقولي اني واقع لحد السكر..

وان مفيش حد حيقعد الوقت ده كله..ولسة جواه المشاعر و الذكريات دي..

بقيت اقول يمكن الهزة دي قرصة ودن..يمكن تجديد روح الحكاية..يمكن درس لسة ما فهمتوش وما جاتش نهايته..


تلات سنين ونص دلوقتي..ولسة بتلخم مجرد النظر من بعيد بس في المرات القليلة..

بدأت الخيوط تحن..وبدأت تربط خيوط رفيعة تاني..خيوط بتقول ان ممكن الحكاية تكون ما خلصتش..

بس انا بقيت قانع بالخيط الرفيع..اللي مديني امل وروح اعيش..ومش بحاول اتخطاه لحد ما يجيي وقته..

ولو راح و ما كانش فيه نصيب..حتفضل انبل قصة في حياتي..قصة بتقولي اني يوما ما روحي سمت وكانت نبيلة كفاية انها تتطلع لروح انبل..وتنهي الحكاية بكل نبل..

ولو اني فعلا مش حلاقي اللي لقيته..لانه لمس روحي..مش غريزة بتدفع الانسان..

ورغم ان الكلام ع الحب من نظرة..كلام متعاد..
وان الصدفة احيانا..بتبقى بالف الف ميعاد..
ورغم ان الكلام اصلا..بينقص حبة كل ما زاد..

ورغم اني جدع وتقيل..وعمري ما اقولها بالساهل..
انا نفسي اقولهالك..في اول مرة نتقابل..

فلو كان المكان يسمح..
وست الكل لو تئذن..
انا عايز اقول اني..

بحبك..

من زمان..
جدا..