محل الحلويات..

تلك المرحلة..

اللي بتشوف نفسك فيها انك تعرف حاجات عن حاجات كتير..بس مش متمكن من ولا حاجة منهم..

عامل زي ما تكون عيل صغير دخل محل حلويات..كل ما يشوف حاجة تعجبه يبقى عايز ياخدها..يفضل ماشي في المحل عمال يلم كل حاجة..و هو مش مدرك ان الحاجات دي بفلوس..هو مش مدرك الفلوس دي اصلا..بياخد الحاجات اللي عجبته..و حبها..

لحد ما يوصل للكاشير..يكتشف ان فيه حاجة اسمها فلوس..و انه مش حيقدر ياخد كل ده..فيبدأ يقلل..لحد ما ياخد حاجات بسيطة من كل حاجة..عمره ما حيتشبع بيها..

شايف عيال تانية حواليه بتاخد حاجة حلوة واحدة..بس بتاخد منها علبة او اكتر..و عيال تانية معاها فلوس اكتر..بتاخد اكتر من حاجة حلوة..

يفضل يبصلهم..يطلع بالحاجات اللي معاها..يبدأ يحطها على بعض و يعمل حاجة حلوة بتاعته هو..ممكن تعجبه هو..بس في نظر اي حد..دي "عك"..

يقرر انه حيحوش..و كل شوية يخش عشان يجيب حاجة واحدة بس..بس يجيب العلبة كلها..

يلاقي حاجة أحلى..و جديدة..فيقول: حجيب منها حبة..و حبة من العلبة اللي انا جايلها..و ابقى اجيب العلبة بعدين..

و يستمر الحال..لا هو بيجيب كل حاجة..و لا هو بيكمل العلبة..