بين كتمان الوجع..و البوح به !

يمكن يكون شئ كنت كاتمه..بس حسيت اني لازم اطلعه..و أوثقه..

و عشان هو شعور قوي..فضلت انه ما يكونش متكلف..بكلامي العادي..

الوجع جوايا فوق الوصف..ولو فكيت الوش الجامد اللي انا لابسه دلوقتي حنهار..

 مش عايز ابين لحد الوجع ده..عشان لو حد لاحظه حتوجع أكتر..

الناس ما بتقدرش الوجع ..

بالنسبة لواحد زيي عنده كبرياء رهيب..الشفقة وجع..و التأنيب برضو وجع..و اللوم وجع.. و اللي بيلومك ازاي تتوجع..وجع..

انا ما بقيتش بطلع الوجع غير و انا لوحدي..و بخبيه اول ما حد يطلعلي..عشان ما حدش يشوفه..ما حدش شايف مني غير الجانب الثابت القوي..حتى في البيت..

ماحدش بيقدر..اللي حيلوم و اللي حيشفق الاتنين مؤلمين و بيوسعوا الجرح..الكتمان بيخلي الجرح مخفي بس..

طول ما الجرح مخفي..محدش بيلوثه..فرصة التئامه اكبر..

بحس بنقيض..بالحاجة لاني اتكلم و الضرورة اني ما اتكلمش..

و حتى لما بحب اتكلم..محدش بيسمع..

كل واحد شايف جانب واحد عايزك تفضل فيه..

حسيت اني مش قادر..اني عايز اتكلم..

حسيت اني محتاج حتى لو اقعد كدة و جنبي حد بيسمع بس..يسيبني اطلع اللي جوايا..

الدنيا عمالة تضيق جدا..بس انا متأكد انها بتضيق عشان حتفتح..و حتفتح جامد..

"ضاقت فلما استحكمت حلقاتها *** فرجت و كنت أظنها لا تفرج"

في النهاية..انا بشر..ولازم وجعي ياخد حقه..

ظهور الوجع مش دايما ضعف..و كتمانه مش دايما دليل قوة..

بس انك تخفيه عن اللي حيزوده..و تكشفه للي حيعالجه..

هي دي القوة..

و في النهاية..

ربنا بيداوي..